Америкалық The Washington Post газетінің жазуынша, 13 сәуірде Ресей Украинаның Сумы қаласына ракетамен шабуыл жасағанда Сумы университетінің жертөлесінде әскерилерді марапаттау рәсімі болып жатқан. Бұл туралы газетке Украина қарулы күштерінің әскериі айтқан. Ол әскерилер зардап шекпеді деген.
Басылымның дереккөзі марапаттау рәсімін өткізуді "жауапсыздық" деп, бұған Сумы облысы әскери әкімшілігінің басшысы Владимир Артюхты айтыптаған.
13 сәуірде Украинаның Сумы қаласына жасалған шабуылдан 35 адам қаза тауып, 117 адам жараланған. Екі ракета қала ортасына түскен. Сумы облысы Конотоп қаласының мэрі Артем Семенихин шабуыл болған күні Сумыда әскерилерді марапаттау рәсімі болып жатқанын айтқан.
Кейін Артюх 13 сәуірде Сумыда "әскерилерді марапаттау рәсімі жоспарланғанын" мойындап, "менің ұйымдастыруға қатысым жоқ, шақыртылған қонақ болдым" деген еді. Бірақ ол шара өткен-өтпегенін айтпаған.
15 сәуірде Украина президенті Владимир Зеленский Артюхты қызметінен алғаны хабарланды.
Ал Ресей қорғаныс министрлігі Сумыда әскерилерге шабуыл жасалғанын, "60 солдаттың көзі жойылғанын" айтқан.
Your browser doesn’t support HTML5
Сумыға шабуылдың анық-қанығы